السلام عليكم قرائي

تدوينة عفوية من قلبي لقلوبكم .. عامية حتى تصلكم بحروف متواضعة

بعد سنين الدراسة الطويلة ~ وبعد الإرهاق و الكرف في السنة التحضيرية

دخلت على سنة جديدة كليا في حياتي , سنة كانت عكس كل شيء عشته قبلها

كل حاجة سويتها وشفتها و اتعاملت معاها , انقلبت فجأة ! كل شيء اتحول في لحظة وحدة

سبحان الله .. قبل ما يحصل دا كلّه ,كنت دائما استمتع بقراءة كتب تطوير الذات والمرونة وتقبل التغيير

كتاب ورا كتاب, أحاول أتعلم إني أكون مرنة عشان ما يصير فيه حاجة تصدمني وتوقفني إني أعيش حياتي زي ما أبغاها

بعد ما أنخرطت في حياتي الجديدة قعدت أفكّر : يعني لدي الدرجة ربي كان رحيم بيا .. لدرجة إنه ألهمني أقرأ 15 كتاب تقريبا عن التغيير عشان يساعدني في المستقبل !

التغيير في حياتي بالنسبة ليا كان جدا جدا قوي .. ما أعرف البعض كيف حيشوفه وكيف حينظر له

لكن كان تغيير عميق في كل شيء ..

اتحديت نفسي ! اتحديت كل الظروف اللي مرت وانا اقول :

حتى الأجهزة و الجمادات كل سنة تتطور عن السنة اللي قبلها .. ماعدا احنا ! إيوة .. ماعدا احنا زي ما احنا

عقولنا البشرية و أجسامنا و شخصياتنا وانجازاتنا .. زي ماهيا مع مرور 360 يوم عليها

كتير … كتير مرة .. لازم أكون واعية .. أنا لازم أصحى !

جلد الذات له فوائد دائما تعطي نتائج مبهرة

سمعت ممثل مرة من المرات بيسأل أصحابه  :

ايش هوا العمر اللي يعتبر منتصف حياتكم ؟

أغلبهم قالوا انه متوسط الأعمار 80 سنة .. يعني النص سار 40 سنة

يعني اللي يوصل عمره 40 سنة يتعبر وصل لنص حياته

طبيعي أكثرنا حيفكر تقريبا بنفس التفكير

لكن الممثل كان له فكر مختلف , قال :

من وجهة نظري عمر الانسان ينقسم لقسمين :

طفولة ورشد

متى الانسان ينضج ويتحول من طفل لراشد ؟ تقريبا في عمر ال18 الى ال20

لذلك انت اذا كنت في ال20 معناه وصلت لنص عمرك !

“ايش حتسوي في النص الباقي ؟

بعد ما سمعته قالها .. وقفت مع نفسي وقلت جا الوقت اللي أثبت ذاتي فيه

 بداية هذا الإثبات كان عام 2015 ..

وبعدها فاجأني عام 2016 بالتغييرات اللي حصلت  ,,

:رح أقولكم هيا باختصار

حياتي كانت عبارة عن دراسة , كتب , ومحيطي الصغير مع عائلتي وصديقاتي

ماكانت أحلامي وأمنياتي إني أتزوج أبدا .. كنت مستبعدة دي الفكرة من بالي لأبعد حد من أول ما دخلت المرحلة الثانوية

خططت للسنوات الجاية كلها على أساس اني أخلص دراستي و بعدها إذا أتزوجت مارح يكون عندي إشكال

طبعا كان هذا خطأ كبير مني .. إني استبعدت شيء ممكن ربي يكون كاتبه وفي أي لحظة يسير

سنة 2016 .. سار واتزوجت  , وكان هذا التغيير اللي سحب معاه كل شيء

زوجي عنده دورة برا المملكة لمدة سنتين ..وأجلت دراستي لمدة سنتين عشان أطلع معاه

أقبلت على دولة جديدة , مجتمع جديد , بيت جديد , بيئة مختلفة و الأكبر من كده : مسؤولية من نوع جديد مع شخص جديد

كعادة أغلب البنات .. مدللة تماما في بيت أهلي

ماعندنا عاملة في البيت لكن ماما كانت دايما تدعم دراستي و تقدر وقت اختباراتي فبالتالي ماكنت اساعد إلا بأشياء خفيفة (جدا) في الأشغال

كان جُل مسؤوليتي نفسي .. أنا و دراستي و كتبي

الباقي ماقدر اقول عنه مسؤولية حتى لو كنت أسويه لأني كنت أسويه من باب المساعدة مو من باب تحمل المسؤولية

مع كده كنت فعالة جدا في مدرستي أشارك هنا وهنا و أدخل مسابقات ونشاطات

“وأنا أجرب كل دي الأشياء كتير قالولي :”حس المسؤولية عندك عالي .. احنا نعتمد عليكي

 ما كنت شايفة دا الشيء في نفسي لين واجهت التغيير في حياتي

كان عندي احساس بالمرونة و تقبل التغيير

لكن الغربة خلتني متأكدة منها .. دحين أقدر أقول إني مرنة ..

اللي اقصده طبعا المرونة في الشخصية والتفكير مو الجسم ,

أخاف دحين لما أشوفكم تقولولي سويلنا حركة المسطرة

عموما احنا ماوصلنا للموضوع الرئيسي لسه ..كل دا الكلام كان مقدمة

جيت في دي التدوينة أكتب لكم إنجازاتي في السنتين الفائتة

وللمعلومية أنا من الأشخاص اللي يحطوا أهدافهم كل تلاته سنين مو كل سنة

لأنه غالبا أهدافي شوية شاطحة ويبغالها وقت لين أحققها

ملاحظة بسيطة : مع أنه ما يحتاج أقولكم قرائي الجميلين لكن حابة أنوّه

إني باكتب هذه الإنجازات من باب التحفيز فقط .. وماعندي أي مقصد آخر لأيّ كان

لأني عن نفسي إذا قرأت أو شفت انجازات أحد اتحمس و أحس بدفعة إيجابية

وهذا مقصدي من دي التدوينة.. إني أوصلكم مشاعر وحماس إيجابي

و يلا نبدأ :

اتعلمت الطبخ 

أخدت دورة في صنع الكيك و تزيينه , ودورة المعجنات الفرنسية

حطيت روتين أمشي عليه يساعدني في تقليص الوقت اللي اقضيه في المطبخ .. لأني عارفة لما ارجع إن شاء الله حأكون مشغولة أكتر وعندي دراسة

وعلى سيرة الطبخ كتبت تدوينة شتوية لذيذة لازم تجربوا اللي فيها : مائدتي الدافئة

اتعلمت طريقة انشاء مواقع عالانترنت  

أنشأت مدونتي 

دا الانجاز لحاله يخليني مبسوطه

و عشان كده أحب أشكر كل شخص شجعني وساعدني و كتبلي كلمات جميلة

شكراً .. انتوا ناس تعنولي كتير

 اتعلمت أساسيات المحادثة والكتابة  باللغة اليابانية تعليم ذاتي  

وبكده سار عندي أربعة لغات : عربي , انجليزي , كوري , ياباني

” الكوري والياباني أساسيات المحادثة والكتابة مو عميق زي الانقلش “

 أوقات تجي أضحك على نفسي وأحط عليهم البخاري بس عشان انبسط واتحمس

بالنسبة للغة الكورية كمان تعليم ذاتي لكن زرت كوريا و أتأكدت الحمدلله إنه وقتي ماراح عالفاضي وقدرت أتكلم وفادتني كتير هناك بحكم انهم مو مرة مع اللغة الانجليزية

حاولت أكون انسانة صحية أكثر 

حطيت  نظام صحي أقدر أمشي عليه لأنه الأكل الصحي والرياضة مو لفترة محددة إنما هي أسلوب حياة

الأكل كله بزيت الزيتون .. ابتعدت عن القلي تماما و حتى السمبوسة في رمضان شويتها بالفرن

دخلت الفواكه والخضار في روتيني و زدت من كميات الموية اللي اشربها

اتعلمت المكياج والعناية بالبشرة والشعر 

دا لوحده يبغاله صفقه هههههههههه  .. أنا انسانه لين اتخرجت من الثانوي وأنا ماعرف إلا مرطب لابيلو و صابون الوجه لحب الشباب

دا باختصار كان روتيني < لا صراحة تعبتي نفسك

لما لقيت وقت فاضي جلست اجرب على نفسي واتفرج فيديوهات مكياج لين اتعلمته من البرايمر إلى الكونتور وارتحت الحمدلله

أول كنت أستنى ماما تخلص عشان تسويلي شعري و مكياجي ..كتت على وجه تخرج من الثانوي وأنا حتى الضفيرة ماعرف اسويها

بس دحين خلاص كبرنا واتعلمنا الحمدلله

سويت عملية الليزك لتصحيح النظر 

أشكر الشخص اللي شجعني و أعطاني الفكرة , أشكر كل فرد من عيلتي دعمني

كانت خطوة جريئة بالنسبالي لأني كنت أحب نظارتي وأعتبرها جزء من شخصيتي بحكم إني لبستها في عمر صغير

لكن مبسوطة الحمدلله ومرتاحة من بعدها .. اتأكدت بعد ما اتخلصت منها إنه أنا هي أنا .. لو أي شيء أتغير حأكون نفسي و أتفاءل وأتأقلم مع كل حاجة

عشان كده حسبتها من الانجازات لانها أثرت عليا بشكل إيجابي

اتعلمت أساسيات التصوير الاحترافي عن طريق الانترنت 

أخدت دورة مع الدكتور طارق الحبيب في بناء الثقة بالنفس 

ما أخفيكم إني كنت متردده هل آخدها أو لأ ..

لأنه كنت أحس إني ما احتاجها < واضحة معاكم الثقة ؟ ههههههههههههههههههههه

جدياً يعني أخدتها بس كده تضييع للوقت لأني كنت مرة فاضية .. لكن بعد ما حضرتها استفدت كتير والله

كتبت أهم النقاط في المحاضرة إذا حبيتوا أنزلكم هيا في تدوينة منفصلة إن شاء الله

وبس كده كانت انجازاتي الصغيرة في سنة 2016

مع أنها بسيطة و كلها تعتبر تطوير لنفسي ما أثرت على شيء في المجتمع

لكن عشان نغير العالم لازم نبدأ بأنفسنا

كانت هدي اول خطواتي في العقد العشرين من عمري

دعواتكم ليا وللمسلمين بالتوفيق

استودعتكم الله

مع كل الحب : كانّ


6 comments on “انجازات عام 2016 ~”

  1. تدووينة جممميلة ولططيفة كان 💕
    أحب هذا النوع من الإنجازات، إن شاء الله كماان تكون تدوينة 2017 مليانة أكشنات وأحداث سعيدة بحياتك 😍

    بالتوفيق يا جميلة 💛

  2. تدوينة لطيييفة جداً و استمتعت فيها و بقرائتها
    خصوصاً اني لقيت فيها بعض مما احسست فيه عند زواجي
    لأنه حقيقي كان حاجة غير متوقعة
    و مررة حبيت تنوع انجازاتك ، ربي يجعل عامك هذا مليان طاعة و سعادة و إنجاز

Leave a Reply

Your email address will not be published. Required fields are marked *