السسلام عليكم ورحمة الله وبركاته

كيف حالكم قرائي الجميلين ؟ كيف البرد و أجواءه معاكم ؟

انا في حالة حماس شديد دي اليومين لتدوينات جديدة من نوعها بحكم تغير أحوال الطقس عندنا وانتقاله من البرودة للتجمد

رجعتلكم اليوم بعناية متكاملة من كل النواحي للوجه و الجسم في الشتاء

اغلب البشرات في الشتاء تميل للجفاف , وبحكم إنه بشرتي جافة أصلا , سار عندي خلفية كاملة عن كيفية التعامل معاها

وزدات و اتعمقت دي الخلفية بعد ماجيت اليابان لأنه بشرتي الجافة ماعادت جافة ولا دهنية ..سارت ضبيَّة

مع كل دا الكلام خلينا نبدأ :

أولا : إيش نوع بشرتك ؟

ضروري مرة تعرفي نوعها , لأنه إذا اتعاملتي معاها بشكل مو كويس ممكن يعطيكي نتيجه عكسية

زي ما سار ليا في المرحلة الثانوية ماكنت اعرف بالزبط نوع بشرتي إيش , فكنت اتعامل معاها على اساس انها دهنية بسبب حب الشباب اللي كان يطلعلي

لكن بعدين بعد ما اتعديت مرحلة حب الشباب لاحظت بشرتي سارت ججافة جدا جدا بسبب التعامل الغلط و بسبب غسولات البشرة الدهنية القوية اللي كنت استخدمها

اختل توازن الدهون في وجهي و سارت بشرتي جافة جدا جدا وصعب التعامل معاها .. عشان كده مابغى أي أحد يطيح في نفس موقفي

اذا كنتي تعرفيها تقدري تعدي دي الخطوة وتنزلي تحت للروتين على طول

زي ماكلنا عارفين فيه أربعة أنواع : جافة , عادية , دهنية , ومختلطة .

فيه أساليب كثيرة مع الملاحظة لتغيرات بشرتك تعرفي منها ايش هوا نوع البشرة

لكن حأقولكم على طريقة جربتها و مرة كانت واضحة وعرفت منها على طول نوع بشرتي إيش

*اختبار نوع البشرة*

نحتاج بودرة مضغوطة أو كومباكت باودر

الأفضل ما يكون شفاف يكون بلون أغمق بدرجة من لون بشرتك الأصلية

غسلي وجهك بغسول لطيف ما يكون خاص بحب الشباب أو يكون معاه زيت أبدا .. يعني يكون حموضته متعادلة

الحموضة = PH = (5.5)

بعدها نشفي وجهك كويس و بفرشة وزعي كمية كويسة من البودرة على وجهك بالتساوي لكل الأماكن

واتركيه تقريبا لـ 15 دقيقة بعدها ارجعي اتفحصي وجهك في المراية

اذا البودرة شفتيها نشفت وتحتها بشرتك بدأت تطلع منها قشور من كل الأماكن معناه بشرتك جافة

إذا البودرة جلست على وجهك بنعومة بدون اظهار أي ردة فعل معناه بشرتك عادية

إذا البودرة جفت في أماكن زي الخدود و أعلى الجبهة و كانت فيه لمعة في منطقة الأنف و الذقن معناه مختلطة

أما إذا كانت بشرتك تلمع وتبرق معناه دهنية

ملاحظة : هذا الاختبار مو دقيق مرة ,يعتمد حسب الجو وحسب رطوبة المكان اللي انتي فيه لكن بيساعدك كتير إذا ماكنتي متأكدة

وبس كده بعد ماعرفنا نوع البشرة ننتقل لكيفية التعامل معاها

*العناية الشتوية المتكاملة*

نقسمها لقسمين : عناية يومية وعناية أسبوعية

العناية اليومية :

في الصباح : نغسل وجهنا كويس بـغسول مناسب لنوع بشرتنا

هذا الغسول اللي أنا استعمله , من ماركة ميشا الكورية ,غسول زيتي .. ناس كتير يخافوا يستخدموا الغسولات الزيتية خصوصا اصحاب البشرة الدهنية مع كده اقولكم انه بالعكس مارح يضر بشرتك أبدا حتى لو كانت دهنية .. لأنه لطيف عالبشرة و مناسب جدا للبشرات الحساسة

MISSHA

اوزع كمية كويسه من الغسول على كامل وجهي وبعده بالفرشة الزرقا اللي في الصورة انظف بشرتي تماما من أي أتربة عالقة فيها

بعدها نستعمل إسنس أو مياه مرطبة , موجودة في الصيدليات ومايشترط فيها نوع بشرة محدد يعني استخدمي أي نوع ومارح يأثر عليكي تأثير سلبي

هدا النوع اللي أنا استخدمته من

FANCL

بعده يجي دور المرطب ,بالنسبة ليا استعمل كيو في .. اذا كان سعره مايناسبك البديل له نيفيا للبشرة الجافة

” أصحاب البشرات العادية ضروري يستخدموا منتجات البشرة الجافة في الشتا”

بعد كريم الوجه نحط كريم للعين أو زي اللي باستعمله أنا حالياً مكعب فيتامين إي للعين من ذا بودي شوب

لو امدح من دحين لين بكره في دا المنتج ماحخلص .. منجد ماستعملت شيء غيره بعد عملية الليزك مع كده الهالات اللي سببتها النظارة الطبية كلها خفت بنسة 50% .. لو محتارين أي نوع تاخدوا , هدا ماراح يخيبكم

أفضله كتير عن كريمات العين لأني مره جيت أحط الكريم و اتحمست و دخل أصباعي في عيني وسببلي احمرار و ألم ماراح لأسبوع

فهذا المنتج آمن تماماً للناس اللي تتحمس زيي

وبس كده العناية اليومية في الصباح خلصت

في الليل بعد ازالة المكياج أكرر نفس الخطوات لكن أوقات أزيد عليهم خطوة “بعد الإسنس و قبل المرطب” .. أحط زيت على بشرتي لما تكون جافة بزيادة

استعمل دا الزيت : من نيوكس .. موجود في صيدليات النهدي

جميل مره وفيه نوعين واحد فيه شيمر ” لمعة خفيفة” والتاني زيت عادي سادة

أحب اللي باللمعة لأنها خفيفه وفي الليل لما أكون مو حاطه مكياج يعطي لوجهي رونق جميل وناعم

العناية الأسبوعية :

أسويها في يوم واحد كلها .. ماحب الروتينات اللي تاخد وقت طويل وساعات طويلة وخلطات …الخ

أحب حاجة سريعة و فعالة وجربت منتجات كتير و طرق كتيرة ماقدرت استمر عليها لأنها تاخد وقت بزيادة والواحد مو دايما يقدر يعملها

خلونا نبدأ :

أول خطوة أفتح الموية الحارة في الحمام واقفل الباب لين يسير بخار

بعدها وانا برا الشور اعمل التقشير الجاف .. باستعمال فرشة ناعمة اخدتها من بودي شوب وموجودة في كل الصيدليات

فوائد التقشير الجاف : يساعد في تنشيط الدورة الدموية , يعمل تقشير خفيف للجلد الميت , يقوي مناعة الجسم لانه الجهاز اللمفاوي قريب من البشرة الخارجية , يساعد التصبغات في الاختفاء , يقلل فرصة ظهور التشققات أو الخطوط للحامل

طريقته جدا سهلة ماتاخد ولا دقيقتين :

باستخدام الفرشة نبدأ من تحت من الرجلين الله يكرمكم و نعمل حركات دائرية طلوعاً لفوق ونكمل من الساقين للبطن حتى نوصل للقلب

بعدها نروح لليدين نبدأ من الكف وندور الفرشة بحركات خفيفة ماتخدش البشرة لحتى نوصل للقلب

وبعدها نروح لأسفل الضهر و نتجه طلوعاً للأكتاف لحتى نوصل للقلب

وبس كده خلصنا

بعد التقشير الجاف ندخل الحمام اللي سار كله بخار .. و نستحم استحمام عادي

وبعد الاستحمام نبدأ بالتقشير بالملح أو السكر

فيه منتجات جاهزة في الصيدليات ومحلات التجميل أنا اخدت دا من بودي شوب

ميزته فيه زيت .. دايما استعملي السكرب أو المقشر اللي يكون فيه زيت لأنه آمن ولطيف أكثر عالبشرة ويوفرلك ترطيب اضافي

تقدري تعمليه في البيت باستخدام الملح والزيت .. اخلطي كاسة سكر مع نصف كاس زيت اللوز الحلو أو زيت الزيتون

.وابدئي بالتقشير نفس طريقة التقشير الجاف وصولا للقلب

فيه خطوة إضافيه اسويها في الشتاء : بعد المقشر الزيتي استخدم دا المنتج من لَش

Lush

احطه زي الكريم على كامل الجسم وبعدها اشطفه وبكدة أكون خلصت ..

لما اطلع برا أول شيء اعمله و بشرتي رطبة ولينة إني استعمل فرشة مع نفس الغسول اليومي و اقشر وجهي تقشير خفيف باستعمال الفرشة الالكترونية

وبعده أشطف وجهي و أعمل تقشير لشفايفي  بمقشر للشفايف

لها أشكال كتير .. أنا احب اللي كده في علبه وآخد منها .. فيه ناس تحب اللي يجي زي الروج كل واحد وحسب رغبته

دا اللي أنا استخدمه من

Sara Happ.

المقشر بالسكر يكون أنعم على الشفايف من الملح .. طعمه وريحته ممرره حلوين

ويجي معاه في نفس العلبة مرطب ثقيل للشفايف ريحته وترطيبه حلو

لما أطلع من الشور بتكون مسامات الوجه كلها متفتحه مع البخار

ودا الوقت مثالي للـماسك .. خدي أي ماسك مرطب عندك و حطيه لخمسه دقايق وبعدها أغسليه

انا استعملت ماسك الورد من بودي شوب .. للبشرة العادية والجافة ترطيبه حلو و ريحته مرررة جميلة

أحطه باستعمال فرشة مشطوفة أو فرشة مسطحة زي حقت الكونسيلر أو أي فرشة وجه قديمة عندك رح تنفع

لا تنسي طبعا ترطبي جسمك كله بكريم أو زبدة جسم ثقيلة عشان لا تنقلب نتيجة التقشير عكسية

وبس كده خلصنا من الروتين .. كله على بعضه ياخد ساعة ونص تقريبا حسب سرعتك , لكن مع الاستمرار عليه حتطلعي بنتيجة حلوة ونعومة جميلة

مجرد ساعتين بس في الاسبوع حتغير من نفسيتك وتعطيكي احساس بالرضا و السعادة

هذا الروتين باختصار للي حابة تكتبه و تحطه عندها :

يوميا في الصباح وفي الليل : غسول – اسنس – كريم للوجه – كريم للعين – زيت حسب حاجة بشرتك

مرة في الأسبوع : تقشير جاف – استحمام – تقشير ملحي – ترطيب جوا الشور- تقشيرللوجه – تقشير للشفايف – مرطب للشفايف – ماسك للوجه -ترطيب للجسم

أي وحدة عندها ملاحظة أو استفسار تكتبلي كومنت هنا أو في حسابي عالانستقرام وأنا أكيد حارد عليها في أقرب وقت

اتمنالكم شتاء دافيء وأيام جميلة قرائي

استودعتكم الله

مع كل الحب : كانّ


2 comments on “الروتين الشتوي المثالي للوقاية من الجفاف ~”

  1. اول مره اعرف عن التقشير الجاف مررره شكرًا عالمعلومه الحلوه هاذي ❤❤❤

    ومنتجات كيو ڤي عشق وتجنب مرره عندهم كمان مرطب الشفايف ومرطب لليدين جميل 🙄❤

    والتقشير يا يكون على حركة الساعة أو من جهة وحدة من فوق لتحت وهكذا
    التقشير اللي زي فرك الفرش مضر 😂

    ماننحرم من الإبداع هذا يارب ❤❤

    • يبغالي اشوف مرطب الشفايف ماقد جربته ^^ شكرا ليكي صديقتي ماوفيكي حقك
      بالزبط زي ماقلتي الفرك مضر ههههههه لكن المشية تكون من تحت لفوق باتجاه القلب لاننا نبغى نساعد الدورة الدموية مانكون ضدها ^^
      وانتي عاد افهم مني بالاحياء بس لازم عاد هههههههههههههههه
      مانحرم منك الله يسعدك

Leave a Reply

Your email address will not be published. Required fields are marked *